तळागळातील कार्यकर्ता म्हणजे कडीपत्ता समजणाऱ्यांवर नेतृत्वाच्या हंटरची गरज

पुसद विधानसभा मतदारसंघाच्या राजकारणात कार्यकर्त्यांची भूमिका नेहमीच महत्त्वाची राहिली आहे. मात्र आज काही कार्यकर्त्यांची अवस्था स्वयंघोषित नेत्यांच्या वर्तणुकीवरून कडी बनवताना टाकलेल्या निंबाच्या पानासारखी झाली आहे, म्हणजेच कडीपत्त्यासारखी झाली आहे. अशी राजकीय वर्तुळात चर्चा सुरू आहे.
           कडीला चव आणि औषधी गुण देण्यासाठी निंबाचे पान टाकले जाते; पण कडी तयार झाल्यानंतर ते पान बाजूला काढून टाकले जाते. त्याचप्रमाणे निवडणुकीच्या काळात घराघरात फिरणारा, ऊन-पाऊस झेलत पक्षाचा विचार पोहोचवणारा, मतदारांना जोडणारा कार्यकर्ता निवडणूक संपल्यानंतर मात्र नेतृत्वाच्या विस्मरणात जातो अशी वल्गना करीत काही स्वयंघोषित नेते नेतृत्वावरच प्रश्नचिन्ह निर्माण करून कार्यकर्त्यांचा वाली मीच कसा आहे अशी भावना काही निष्ठावान कार्यकर्त्यांमध्ये निर्माण करीत आहेत.
                   कार्यकर्ता हा केवळ निवडणुकीपुरता वापरण्याचा घटक नाही, तर तो संघटनेचा कणा आहे. पद, सत्ता आणि प्रतिष्ठेपेक्षा तळागाळात काम करणाऱ्या कार्यकर्त्याला सन्मान आणि योग्य वेळी संधी मिळणे गरजेचे आहे. परंतु वरिष्ठ नेतृत्व या बाबीकडे डोळे झाक करीत असल्याची स्वयंघोषित नेते कार्यकर्त्यांमध्ये भ्रम निर्माण करून स्वतः कार्यकर्त्यांचा वाली मीच अशी केविलवाणी प्रतिमा निर्माण करण्याचा प्रयत्न करीत असल्याची निष्ठावान कार्यकर्त्यांमध्ये चर्चा आहे.
              नेतृत्वाने स्वयंघोषित नेत्यांच्या कृतीवर तसेच वागणुकीवर लक्ष देऊन तळागाळातील कार्यकर्त्यांच्या भावना समजून घेतल्या, त्यांच्या अडचणी ऐकल्या आणि त्यांना सोबत घेऊन पुढे गेले, तरच संघटना अधिक मजबूत होईल. अशी भावना निष्ठावंत कार्यकर्ते व्यक्त करीत आहेत. नेतृत्वाने निष्ठावान कार्यकर्ता जपला तर इतिहास घडतो. नेतृत्वाने स्वयंघोषित नेत्यांवर योग्य वेळी योग्य दखल घेत स्वयंघोषित नेत्यांची निष्ठावंत कार्यकर्त्यांकडे बघण्याचा दृष्टिकोणावर हंटर चालवावा   अशीही निष्ठावंत कार्यकर्त्यांमध्ये चर्चा आहे.